Александр Невский
 

2. Новгородская первая летопись младшего извода (до 961 г., 1430—1447 гг.)

Одна из ранних новгородских летописей, где известия доведены до 1447 г. В ее тексте представлен летописный свод 70-х гг. XI в., предшествующий Повести временных лет. Только в составе Н1ЛМ дошла до нас Краткая редакция Русской Правды — древнейшего законодательного акта Древней Руси. Известны два основных списка Н1ЛМ: Академический (БАН, 17.8.36.) и Комиссионный (СПбФ ИРИ, собр. Археогр. ком., № 249). Самое авторитетное издание: Новгородская первая летопись старшего и младшего изводов. Под ред., предисловие А.Н. Насонова. М., Л., 1950. Публикация осуществляется по этому изданию. Разночтения приводятся только для первых трех страниц издания.

Временникъ, еже есть нарицается, лѣтописание1 князей и земля Руския2, и како избра богъ страну нашу на послѣднѣе время, и грады почаша бывати по мѣстом, преже Новгородчкая3 волость и потом Кыевская, и о поставлении Киева, како во4 имя назвася5 Кыевъ.

Якоже древле царь Римъ, назвася и во имя его город Римъ; и паки Антиохъ, и бысть Антиохиа великаа; и паки Селевки, и бысть Селевкиа; и паки Александри, и бысть въ имя его Александриа; и6 по многая мѣста7 тако прозвани быша грады в имена царев тѣхъ и князей тѣхъ: тако жъ и в нашеи странѣ званъ бысть градъ великимъ княземъ во имя Кия, его же нарицаютъ тако перевозника бывша; инѣи8 же: ловы дѣяше9 около города. И тако бо есть промыслъ божий, еже явѣ в послѣдня:10 куда же древле погании11 жряху бѣсомъ на горах, нынѣ же паки туды святыя церкви златъверхия каменозданныя стоят, и монастыреве велицы поставлени быша, и черноризец в нихъ исполнено бысть, безпрестани славяще бога в молитвахъ, въ бдѣнии, в постѣ и в слезахъ, ихъ же ради молитвъ миръ стоитъ. Аще бо къ святымъ сыи прибѣгнемъ,12 церквамъ, тѣм велику ползу прииметъ души и тѣлу. Мы же паки на послѣдование возвратимъся, глаголюще сице о началѣ Русьския земля и о князѣхъ, како откуду быша. Васъ молю, стадо христово, с любовию приклоните уши ваши разумно: како быша древний князи и мужие ихъ, и како отбараху Руския13 землѣ, и ины страны придаху14 под ся; тѣи бо князи не збираху многа имѣния, ни творимыхъ15 виръ, ни продаж въскладаху16 люди; но17 оже18 будяше правая вира, а ту возмя, дааше дружинѣ || на оружье. А дружина его кормяхуся, воююще ины страны и бьющеса и ркуще: «братие, потягнемъ по своемъ князѣ и по Рускои землѣ»; глаголюще19 «мало20 есть намъ, княже, двусотъ гривенъ». Они бо не складаху на своя жены златыхъ обручей, но хожаху жены ихъ в сребряных; и росплодили были землю Руськую. За наше несытоство навелъ богъ на ны поганыя, а и скоты наши и села наша и имѣния за тѣми суть, а мы своих злыхъ дѣлъ не останемъ. Пишетъ бо ся: богатество неправдою сбираемо извѣется21. И паки: сбираетъ, и не вѣсть, кому сбираетъ я. И паки: луче малое праведнику, паче богатьства грѣшныхъ || многа22. Да отселѣ, братия моя возлюбленая23, останемся24 от несытьства25 своего, нь26 доволни будете урокы27 вашими, яко и Павелъ пишеть28: емуже дань, то дань; емуже урокъ, то урокъ; никому же насилья29 творяще, милостинею оцвѣтуще, страннолюбиемъ, въ30 страсѣ божий и правовѣрии свое спасение сдѣвающи, да и здѣ добрѣ [поживем]31 и тамо вѣчнѣи32 жизни причастьници33 будемъ. Си же таковая34. Мы же35 от начала Рускы36 земля37 до сего лѣта и все по ряду извѣстьно38 да скажемъ, от Михаила цесаря до Александра и Исакья.39

В лѣто 6362. Начало земли Рускои. Живяху кождо40 41 съ родомъ своимъ на своихъ мѣстех42 и43 странахъ, владѣюща кождо44 45 родомъ своимъ. И быша три братия: единому имя Кии, второму46 же47 имя Щекъ, третьему48 же49 имя Хоривъ, а сестра их Лыбедь. И сѣдяше Кыи50 на горѣ, идѣже нынѣ увоз Боричевъ, и бѣ с родомъ своимъ; а51 братъ его Щекъ на друзии52 горѣ, от него же прозвася Щековица; а третий Хоривъ, от него же прозвася Хоривица. И сотвориша градокъ, во имя брата своего старѣйшаго и53 наркоша имя Кыевъ54. И бяше около их лѣсъ и боръ великъ, и бяху ловища55 звѣрие56. И бѣша57 мужи58 мудри59 и смысленъ60, нарѣчахуся61 Поляне, и62 до сего дне от них же63 суть кыянѣ64; || бяху же поганъ65, жруще озером и кладязем и66 рощениемъ, якоже прочии67 погани68.

В си69 же времена бысть70 въ Грѣчько71 земли цесарь72, именемъ Михаилъ73, и мати его Ирина, иже проповѣдаеть74 покланяние иконамъ въ пръвую75 недѣлю поста. При семъ76 приидоша Русь77 на Царьград в кораблех, бещислено78 корабль79; а80 въ двусту81 вшедше въ Суд82, много зло створиша83 Грекомъ и убийство84 велико85 крестияномъ86. Цесарь же съ патриархомъ Фотѣемъ молбу87 створи въ церкви святыя Богородица Влахернѣ88 всю нощь; тацѣ89 святѣи богородици ризу изънесъше90, въ море скудь91 омочиша; а92 во время то яко93 тишинѣ сущи, и94 абие буря въста95, и потапляше96 корабля рускыя, и97 изверже я на брегъ, и во своя сы98 возвратишася99.

По сих лѣтех100 братня101 сии изгибоша102; и быша обидими103 Древьляны104, инѣми105 околними106. И наидоша107 я Козаре на горах сих сѣдяща в лѣсѣх, и рѣша: «платите108 намъ дань». Съдумавши109 же Полянѣ110 и даша от дыма мечь. И несоша111 Козаре112 къ113 князю своему и старѣишинамъ своимъ. Князь же созва старѣйшины своя и рече имъ: «се налѣзохомъ дань нову». Онѣ же рѣша ему: «откуду». Он же рече: «в лѣсѣ на горахъ надъ рѣкою Днепрьскою». Они114 же рѣша: «что суть далѣ». И показа им мечь; и рѣша старци козарьстѣи115: «не добра дань116, княже; мы ся доискахомъ оружьемъ одиноя страны, рекше са||блями; а сих же оружье117 обоямо остро, рекше мечи; сии имут и на нас имати дань и на иных странахъ». Се сбысться все; не от своея воля рекше, от божиа повелѣниа. Якоже при фараонѣ цесари египетьстѣ, егда приведоша Моисѣа, и рѣша старѣйшины фараоня: «сей хощеть смирити власть Египетьскую»; яко и бысть; и погыбоша Египтяне от Моисиа, а первѣе бѣша работающе имъ; тако и си пръвѣ владѣша, послѣ же самими владѣша; якоже и бысть: владѣют бо Козары князи рускыи и до днешьняго дни. Нь мы на преднее возратимъся. И по сих, братии тои, приидоста два Варяга и нарекостася князема: единому бѣ имя Асколдъ, а другому Диръ; и бѣста княжаща в Киевѣ, и владѣюща Полями; и бѣша ратнии съ Древляны и съ Улици.

Въ времена же Кыева и Щека и Хорива новгородстии людие, рекомии Словени, и Кривици и Меря: Словенѣ свою волость имѣли, а Кривици свою, а Мере свою; кождо своимъ родомъ владяше; а Чюдь своимъ родом; и дань даяху Варягомъ от мужа по бѣлѣи вѣверици; а иже бяху у них, то ти насилье дѣяху Словеномъ, Кривичемъ и Мерямъ и Чюди. И въсташа Словенѣ и Кривици и Меря и Чюдь на Варягы, и изгнаша я за море; и начаша владѣти сами собѣ и городы ставити. И въсташа сами на ся воевать, и бысть межи ими рать велика и усобица, и въсташа град на град, и не бѣше в нихъ правды. И рѣша к себѣ: «князя поищемъ, иже бы владѣлъ нами и рядилъ ны по праву». Идоша за море к Варягомъ и ркоша: «земля наша велика и обилна, а наряда у нас нѣту; да поидѣте к намъ княжить и владѣть нами». Изъбрашася 3 брата с роды своими, и пояша со собою дружину многу и предивну, и приидоша к Новугороду. И сѣде старѣишии в Новѣгородѣ, бѣ имя ему Рюрикъ; а другыи сѣде на Бѣлѣозерѣ, Синеусъ; а третеи въ Изборьскѣ, имя ему Труворъ. И от тѣх Варягъ, находникъ тѣхъ, прозвашася Русь, и от тѣх словет Руская земля; и суть новгородстии людие до днешняго дни от рода варяжьска.

По двою же лѣту умре Синеусъ и брат его Труворъ, и прия власть единъ Рюрикъ, обою брату власть, и нача владѣти единъ. И роди сынъ, и нарече имя ему Игорь. И възрастъшю же ему, Игорю, и бысть храборъ и мудръ. И бысть у него воевода, именемъ Олегь, муж мудръ и храборъ. И начаста воевати, и налѣзоста Днѣпрь рѣку и Смолнескъ град. И оттолѣ поидоша внизъ по Днѣпру, и приидоша къ горам кыевъскым, и узрѣста городъ Кыевъ, и испыташа, кто в немъ княжить; и рѣша: «два брата, Асколдъ и Диръ». Игорь же и Олегъ, творящася мимоидуща, и потаистася въ лодьях, и с малою дружиною излѣзоста на брегъ, творящася подугорьскыми гостьми, и съзваста Асколда и Дира. Слѣзъшима же има, выскакаша прочии воины з лодѣи, Игоревы, на брегъ; и рече Игорь ко Асколду: «вы нѣста князя, ни роду княжа, нь азъ есмь князь, и мнѣ достоить княжити». И убиша Асколда и Дира; и абие несъше на гору, и погребоша и Асколда на горѣ, еже ся нынѣ Угорьское наричеть, идеже есть дворъ Олминъ; на тои могылѣ постави Олма церковь святого Николу, а Дирева могыла за святою Ириною. И сѣде Игорь, княжа, в Кыевѣ; и бѣша у него Варязи мужи Словенѣ, и оттолѣ прочии прозвашася Русью. Сеи же Игорь нача грады ставити и дани устави Словеномъ и Варягомъ даяти, и Кривичемъ и Мерямъ дань даяти Варягомъ, а от Новагорода 300 гривенъ на лѣто мира дѣля, еже не дають. И пакы приведе себѣ жену от Плескова, именемъ Олгу, и бѣ мудра и смыслена, от нея же родися сынъ Святославъ. По сих же пакы временех.

В лѣто 6428. Посла князь Игорь на Грѣкы вои Русь скыдеи 10 тысящь. И приплыша ко Цесарюграду, и многа зла створиша Русь: Суд бо весь пожгоша огнемъ; а ихъ же имше плѣнникы, овѣх растинаху, иныя же къ землѣ посѣкаху, другыя же поставляюще, стрелами стрѣляху; елико же ратнии творят, изъломяще опакы руцѣ и связающе, гвозды желѣзны посрѣде главъ вбивающе; и многыи церкви огневи предаша. Въ время же то царствующю во градѣ Роману, и абие посла Романъ цесарь патрикыя Феофана съ вои на Русь, и огненымъ строемъ пожьже корабля рускыя. И възратишася Русь въ своя. Том же лѣтѣ препочиша и другое, на третьее идоша.

В лѣто 6429. Игорь и Олегь пристроиста воя многы, и Варягы и Полянѣ и Словенѣ и Кривичи, и корабля многы бещисленыи.

В лѣто 6430. Иде Олегь на Грѣкы и прииде къ Цесарюграду; и Греци замкоша Съсуд, а град затвориша. И вълѣзъ Олегь, и повелѣ изъвлещи корабля на брегъ, и повоева около града, и много убийство створиша Грекомъ, и разбита многы полаты и церкви. И повелѣ Олегъ воемъ своимъ колеса издѣлати и въставити корабля на колеса. И бывъшю покосну вѣтру, и въспяша прѣ, и с поля идоша къ граду. И увидѣвше же, убояшася Греци, и рѣша, выславше къ Олъгови: «не погубляи града; имемъся по дань, якоже хощеши». И исъстави Олегъ воя; и внесоша ему брашно и вино, и не прия его, бѣ бо устроено съ отравою. И убояшася Грѣчи, и рѣша: «нѣсть се Олегъ, нь святыи Дмитрии посланъ от бога на ны». И заповѣда Олегъ дань даяти на 100, 200 корабль, по 12 гривнѣ на человѣкъ, а в кораблѣ по сороку мужь. Самъ же взя злато и паволокы, и возложи дань, юже дають и доселѣ княземь рускымъ. И рече Олегъ: «шиите прѣ паволочитѣ Руси, а Словеномъ кропинны»; и бысть тако. Повѣси щитъ свои въ вратех, показая побѣду; и поиде от Цесаряграда. И воспяша прѣ Русь паволочитыя, а Словенѣ кропинныя; и раздра вѣтръ кропинныя. И рѣша Словенце: «имемся своих тольстинах; не даны суть Словеномъ прѣ». Прииде Олегъ къ Кыеву и ко Игорю, несыи злато и паволоки и вино и овощь. И прозваша Олга вѣщии; и бяху людие погани и невѣгласи. Иде Олег к Новугороду и оттуда в Ладогу. Друзии же сказають, яко идущю ему за море, и уклюну змиа в ногу, и с того умре; есть могыла его в Ладозѣ.

Игорь же сѣдяше в Киевѣ княжа, и воюя на Древяны и на Угличѣ. И бѣ у него воевода, именемь Свѣнделдъ и примучи Углѣчѣ възложи на ня дань, и вдасть Свѣньделду. И не вдадяшется единъ град, именемъ Пересѣченъ; и сѣде около его три лѣта, и едва взя. И бѣша сѣдяще Углицѣ по Днепру вьнизъ, и посемь приидоша межи Бъгь и Днѣстръ, и сѣдоша тамо. И дасть же дань деревьскую Свѣнделду, и имаша по чернѣ кунѣ от дыма. И рѣша дружина Игоревѣ: «се далъ еси единому мужевѣ много». Посем скажемъ въ преключившихся лѣтех сих.

В лѣто 6431.

В лѣто 6432.

В лѣто 6433.

В лѣто 6434.

В лѣто 6435.

В лѣто 6436.

В лѣто 6437.

В лѣто 6438.

В лѣто 6439.

В лѣто 6440.

В лѣто 6441.

В лѣто 6442.

В лѣто 6443.

В лѣто 6444.

В лѣто 6445.

В лѣто 6446.

В лѣто 6447.

В лѣто 6448. В се лѣто яшася Уличи по дань Игорю, и Пересѣченъ взят бысть. В се же лѣто дасть дань на них Свѣнделду.

В лѣто 6449.

В лѣто 6450. Въдасть дань деревьскую Свѣнделду тому же.

В лѣто 6451.

В лѣто 6452.

В лѣто 6453. В то же лѣто ркоша дружина ко Игоревѣ: «отрочи Свѣньлжи изодѣлися суть оружиемъ и порты, а мы нази; а поиди, княже, с нами на дань: а ты добудеши, и мы». И послуша их Игорь, иде в данѣ, и насиляше имъ и мужи его; и возмя дань, поиде въ свои град. Идущу же ему въспять, размысливъ, рече дружинѣ своей: «идѣте с данью домовъ, а язъ возвращуся и похожю еще». И пусти дружину свою домовъ, с малою дружиною възратися, желая болшаго имѣниа. Слышавше Древляне, яко опять идет, сдумавше же Древляне съ княземъ своимъ Маломъ: «аще ся волкъ въ овця ввадит, то выносит все стадо, аще не убиют его; тако и сей, аще его не убиемъ, то все ны погубит». И послаша к нему, глаголюще сице: «почто идеши опять; поималъ еси всю дань». И не послуша Игорь; и изшедше Древлянѣ из града Корестеня противу, и убиша Игоря и дружину его: бѣ бо их мало. И погребоша Игоря; и есть могыла его близъ града Коростеня въ Древех и до сего дни. А Олга же бяше в Киевѣ съ сыномъ своимъ дѣтьскомъ Святославомъ, и кормилец его Асмудъ, и воевода бѣ Свѣнделдь, тътъ же отець Мьстишинъ. Рѣша же к себѣ Дрѣвляне: «се князя убихомъ рускаго; поимемъ жену его Олгу за князь свои Малъ, и Святослава, и створимъ ему, якоже хощеть». И послаша Древляне лучьшихъ мужь, числомъ 20, в лодьи к Олзѣ; и присташа под Биричевомъ, бѣ бо тогда вода текущи подлѣ горы Кыевьскыя, и на полѣ не сѣдаху людие, нь на горѣ; град же бяше Киевъ, идеже есть нынеѣ Гродятинъ и Микифоровъ дворъ, а княжь бяше дворъ во градѣ, идеже есть нынѣ дворъ Воротиславль и Чюдинъ; а первѣе сице бѣ внѣ града дворъ другыи, бѣ бо ту теремъ каменъ. И повѣдаша Олзѣ, яко Древлянѣ приидоша, и возва я Олга к собѣ, и рече имъ: «добрѣ приидоша гостье». И рече Олга: «да глаголете: что ради приидосте сѣмо». Рѣша же Древлянѣ: «посла насъ Деревьская земля, ркуще сице: мужа твоего убихом, бяше бо мужь твои акы волкъ, восхыщая и грабя; а наши князи добри суть, расплодили землю нашю. И поиди за князь нашь за Малъ: бѣ бо имя князю нашему деревьскому Малъ». Рече же имъ Олга: «люба ми есть рѣчь ваша, уже мнѣ своего мужа не въскресити; нь хощу вы почтити наутрия пред людьми своими, а нынѣ идете в лодью свою и лязите в лодьи, величающеся; и азъ заутра пошлю по вас, вы же, величающеся, рцѣте: не идемъ на конех, ни пѣши идемъ, но понесете ны в лодьи; и вознесут вы въ лодьи». И отпусти я в лодьи. И Олга же повелѣ ископати яму велику и глубоку на дворѣ теремьстѣмъ внѣ града. И заутра Олга, сѣдящи в теремѣ, посла по гости. И приидоша к нимъ, глаголюще: «зоветь вы Олга на честь велику». Они же рѣша: «не идемъ на конѣх, ни на возехъ; нь понесете ны в лодьи». И рѣша кыянѣ: «неволя есть намъ; князь нашь убиенъ бысть, а княгынѣ наша хощеть за вашь князь»; и понесоша я в лодьи. Онѣ же сѣдяще и гордящеся въ великыхъ перегбехъ и сустугах. И пакы принесоша я на дворъ къ Олзѣ, и абие въринуша въ яму и с лодьею. И Олга съшедши к нимъ и приникъши, видѣ и рече имъ: «вы есте послове Деревьскои земли и приидосте к намъ от своего князя Мала; добра ли вы есть честь». Они же рѣша: «пущи нам бысть Игоревѣ смерти». И княгынѣ Олга повелѣ засыпати их живых; и абие засыпаша ихъ. Якоже пославши Олга къ Древляномъ и сице глагола имъ: «аще мя право просите, то пришлите мужи нарочиты, да в велицѣ чести поиду за вашь князь, понеже бо не пустять мене людье кыевьстѣи». Се слышавши Древлянѣ, избраша лучьшии мужи нарочиты, иже держаша Деревъскую землю, и послаша их по Олгу. Древляномъ же пришедшимъ къ Кыеву къ княгинѣ Ольги, и прияше Олга въ честь деревьскых муж, и повелѣ на них мовь створити: «измывшеся, приидѣте ко мнѣ». Они же прежгоша избу, и влѣзоша Древляне мытся; и запроша избу о них, и повелѣ зажещи на нихъ огнемъ от дверии, и ту съгорѣша вси. И пакы приложи к тому Олга послати къ Древляном, сице глаголющи имъ: «се уже иду к вамъ; да пристроите ми меды многы у града, идеже убисте мужа моего, да поплачюся надъ гробомъ его, и створю тризну мужеви своему». И они же то слышавше, свезоша мед многъ зѣло и извариша. А Олга же поимши мало дружины и легко идущи, прииде къ гробу его, и плакася по мужи своем плачемъ велиимъ зѣло. А людемъ въ время то повелѣ съсыпати могылу велику; и яко ссыпаша, и повелѣ трызну створити. И посемъ сѣдоша пити Древлянѣ; и повелѣ Олга отрокомъ своимъ служити пред ними. И рѣша Дрѣвлянѣ къ Олзѣ: «гдѣ суть дружина наша, ихъ же послахомъ по тебе». Она же рече: «идуть по мнѣ с дружиною мужа моего». И яко упишася Древляне, и повелѣ отроком своимъ пити на нѣ, а сама отъиде кромѣ, и повелѣ дружинѣ сѣчи Древляны; и исъсѣкоша ихъ 5000. А Олга възратися в Киевъ, и пристрои вои на прокъ ихъ.

Начало княженья Святославля. В лѣто 6454. Олга съ сыномъ своимъ Святославомъ събра вои многы и храбры, иде на Деревъскую землю. Изидоша Древляне противу; и снемшимася обѣима полкома на совокупъ, и суну копьем Святославъ на Древляны, и копие летѣ сквозѣ уши коневѣ, бѣ бо велми дѣтескъ. И рече Свѣнделдъ и Асмуд: «князь уже потяглъ; потягнѣмъ, дружино, и мы по князѣ». И побѣдиша Древляны; и возложиша на них дань тяжку, и двѣ части дани Кыеву идет, а третьяя Вышегороду ко Олзѣ: бѣ бо Вышегород Олгинъ град. И иде Олга по Деревьстѣи землѣ съ сыномъ своимъ и с дружиною своею, уставляющи уставы и урокы; и суть становища ея и ловища. И прииде въ свои град Кыевъ съ сыномъ своимъ Святославомъ, и пребывши лѣто едино.

В лѣто 6455. Иде Олга к Новугороду, и устави по Мьстѣ погосты и дань; и ловища ея суть по всей земли, и знамение и мѣста по всеи земли, и погосты; а санки ея стоять во Пьсковѣ и до сего дни; по Днѣпру перевѣсища и села, и по Деснѣ есть село ея и доселѣ. И възвратися къ сыну своему Кыеву, и пребываше с нимъ въ любви.

В лѣто 6456.

В лѣто 6457.

В лѣто 6458.

В лѣто 6459.

В лѣто 6460.

В лѣто 6461.

В лѣто 6462.

В лѣто 6463. Иде Олга во Грекы и прииде Цесарюграду. И бѣ тогда цесарь именемь Чемьскыи; они же повѣдаша цесарю приходъ ея, и абие цесарь возва ю к собѣ; она же иде к нему, ничто же медлящи. И видѣвь ю цесарь зѣло добру сущу лицем и смыслену въ премудрости, удививъ же ся цесарь разуму ея, и пакы бесѣдовавши, рече к неи: «подобна еси с нами царствовати въ градѣ сем». Она же разумѣвши, рече ко цесарю: «азъ погана есмь; да аще мя хощеши крестити, то крести мя самъ; аще ли сего не сотворити, то не имамъ креститися». Царь же послуша словесѣ сего и абие крести ю съ патриархомъ. Просвѣщена же бывши, и она же тогда радовашеся душею и тѣломъ. И тѣмъ яко поучивши ю патриархъ о вѣрѣ, и рече еи: «благословена ты въ женах рускых, сице бо оставивши тму, а свѣт возлюби; и благословити тя имуть сынове рустѣи в послѣдняя дни родове внукъ твоих». И заповѣда еи о церковномъ уставѣ и молитвѣ и о постѣ, и о милостинѣ и о воздержании тѣла чиста. Она же, поклонивши главу, стояше, акы губа напаяема, внимающи учению; и поклонившися патриарху, глаголюще: «молитвами твоими съхранена буду, честнеишии владыко, от сѣти неприязнены». Бѣ бо имя еи наречено въ крещении Елена, яко древняя цесариця, мати великогоКостянтина. И благослови ю патриархъ и отпуси. И по крещении призва ю цесарь, и глагола еи: «хощу тя поняти себѣ женою». Она же рече: «како хощеши мя поняти, крестивъ мя сам и нарекъ мя себѣ дщерью; а въ крестиянѣх сего нѣсть закона, а ты, цесарю, самъ вѣси». И рече цесарь прѣдстоящимъ ту велможамъ своимъ: «упремудри мя Олга словесы своими»; бѣ же она мудра словесы. Цесарь же пакы Чемьскыи, слышавши глаголы ея, дасть еи дары многы: злато и сребро, и паволокы, и съсуды разъноличныя; и абие цесарь отпусти ю, нарекъ себѣ дщерью. И Олга, княгынѣ руская, хотящи възвратитися къ странѣ своеи, прииде къ патриарху, благословения просящи на домъ свои, и рече ему: «людие мои погани, и сынъ мои тако же поганъ бѣ, да бы мя богъ съблюлъ от всего зла». И рече еи патриархъ: «чадо вѣрное; въ Христа крестилася еси, въ Христа облечеся, Христос имать съхранити тя; якоже съхрани Еноха въ пръвыи род, и потомъ Ноя в ковчезѣ, Авраама от Авимелеха, Лота от содомлянъ, Моисѣя от фараона, Давыда от Саула, трие отрокы от пещи, Данила от звѣрии, и тако и тебе избавить от неприязнѣ и от сѣтеи его». И благословивъши патриархъ со вселеньскымъ соборомъ, и отпусти ю с миромъ въ свою землю; и пришедши еи пакы къ Кыеву, принявши святое крещение и божественыя дары въ Цесарьскомъ градѣ от честнѣишаго патриарха. Се же тако бысть, яко при Соломонѣ царѣ: прииде ефиопьская цесариця къ Соломону, слышати хотящи премудрость Соломоню многу и знамения видѣти: тако си блаженая Олга искаше добра и мудрости божия; нь она человѣческыя, а си божиа. Ищющии бо премудрость обрящуть; понеже бо премудрость на исходящих поется, на путехъ же деръзновение водить, на краихъ же стѣнозабралных проповѣдается, въ вратехъ же градных дерзающи глаголет, елико убо лѣт незлобии держатся по правду. И си бо от възраста блаженая Олга искаше мудростию всего въ свѣтѣ семъ и налѣзе бисеръ многоцѣнныи, еже есть Христосъ. Рече бо Соломонъ: «желание благовѣрных наслажаеть дупло, и приложиши сердце твое в разумъ; азъ любящая люблю, и ищущии мене обрящет». И рече господь: приходящая ко мнѣ не иждену вонь. Сия же Олга, по внегда пришедши еи уже в Киевъ, и якоже о неи въпред рекохомъ, посла же к неи царь Чемьскыи, глаголя сице, яко «много одарих тя; ты бо ми рекла еси тако, яко аще възращуся в Русь, и многы дары пришлю ти, челядь и воскъ и скору, и вои в помощь». И отвѣщавши же Олга, и рече къ Соломѣру: «аще ты сице глаголеши от Чемьскаго цесаря, рци ему: тако пришедши, постоиши у мене в Почаинѣ, якоже и азъ у тебе въ Съсуду стоявши, то тогда ти дамъ». И сиа пакы словеса глаголавши много, и абие отпусти приходящая послове къ Царьскому граду. Живущи же Олга съ сыномъ своимъ Святославомъ, и учаше его мати креститися, нь небрежаше того словесѣ, ни въ уши влагаше себѣ; нь аще кто хотяще волею креститися, не възбраняху ему, нь паче ругахуся тому. Невѣрнымъ бо есть вѣра крестианьска уродьство есть; не смыслиша бо, ни разумѣша, во тмѣ ходяща, не видят славы господня; одебелѣша бо сердца ихъ, и ушима тяжко слышати и очима видѣти. Рече бо Соломонъ: «дѣлатель нечьстивыхъ далече от разума; понеже звах вы, не послушаете, и прострох словеса, не внимаете, нь отметаете моея советы, моих же обличении не внимаете; възненавидѣша бо премудрость, а страха господня не изволиша, ни хотяху внимати моих словесъ, подражаху моя обличениа». Якоже и Олга часто глаголаше: «и азъ, сыну мои, бога познахъ и радуюся; аще ты познаеши, и радоватися начнеши». Онъ же не внимаше, глаголя: «како азъ хощу инъ законъ принять единъ, а дружина смѣятися начнуть и ругатися». Олга же рече ему: «сыну, аще крестишися, вси имут то же творити». Он же не послушаше матери, творяше нравы поганьскыя; не вѣдыи бо, аше кто матери не послушаеть, и пакы в бѣду впадаеть, якоже рече: «аще кто отца не слушаеть или матери, смерть прииметь». Сеи же к тому гнѣвашеся на матерь. Соломонъ же рече: «кажа злыя прииметь собѣ досаждение; облицая злыхъ, да възненавидит тебе». Нь обаче любляше Олга сына своего Святослава, рекущи к себѣ: «воля божия да будет; аще хощеть богъ помиловати роду моего и земли Рускыя, да возложить имъ богъ на сердце обратитися къ богу, якоже и мнѣ богъ дарова». И се рекъши, моляшеться за люди и за сына и по вся нощи и дни, кормящи сына своего до мужества своего и до возраста его.

В лѣто 6464.

В лѣто 6465.

В лѣто 6466.

В лѣто 6467.

В лѣто 6468.

В лѣто 6469.

В лѣто 6470.

В лѣто 6471.

В лѣто 6472. Князю Святославу възрастъшю и возмужавшю, нача вои совокупляти многы храбры; и бѣ бо самъ храборъ, и легко ходя, акы пардусъ; воины многы творяше ходя, а возовъ по собѣ не вожаше, ни котла, ни мясъ варяше, нъ потонку мяса изрѣзавше; конину или звѣрину, грядину на углех испекъ, ядяше; ни шатра имяше, нь подклад постилаше, а сѣдло в головах; такоже у него и прочии вси вои бѣху. И пакы посылаше къ странамъ, глаголя имь сице: «хощу на вы ити». И абие поиде на Оку рѣку и на Волгу. И налѣзе Вятици, и рече Вятицемъ: «кому дань даете». Они же рѣша: «Козаромъ дань даемь по щьлягу от рала».

В лѣто 6473. Иде Святославъ на Козары. Слышавши же Козары, изидоша противу съ княземъ своим каганомъ, и съступишася на бои, и бысть брань, одолѣ Святославъ Козаромъ, и град ихъ Бѣлу вежю взя. И Ясы побѣди и Касогы, и приведе Кыеву.

В лѣто 6474. Победи Святославъ Вятицевъ и дань на них возложи.

В лѣто 6475. Иде Святославъ на Дунаи на Болгары. И бившемся обоимъ, одолѣ Святославъ Болгаромъ, и взя городовъ 80 по Дунаю, и сѣде княжа ту въ Переяславци, и емля дань на Грецехъ.

В лѣто 6939. Преставися на Москвѣ митрополит Фотѣи. Того же лѣта ходиша князи рустѣи въ Рду: Юрьи Дмитриевич, Василии Васильевич.

В лѣто 6940. Выидоша князи рустии из Орды без великаго княжениа. Того лѣта владыка Еуфимии священноинокъ постави церковь древяну святых Апостолъ на Чюдинчевѣ улици. Тои осени приихав Новъгород князь Юрьи Семенович из Литвы. Тои же осени погорѣ околотокъ всь и владычнь дворъ. Того же лѣта заложиша церковь камену святого Юрья на Борковѣ улицѣ.

В лѣто 6940. Выидоша князи рустии из Орды: князь Василии Васильевич, Юрьи Дмитриевич; цесарь Махметь даше княжение великое князю Василию Васильевичю на всеи Рускои земли. Того лѣта владыка Еуфимии постави церковь древяну святых Апостолъ на Чюдинцевѣ улици. Тои осени прииха в Новъгород князь Юрьи Семенович съ своею княгинею из Литовьскои земли.

В лѣто 6941. Загорѣся веснѣ на Яневѣ улици и погорѣ Загородчкыи конець и Людинь конець до Лукинѣ улицѣ. Того же лѣта свершиша борковци церковь камену святого Георгиа. Того лѣта постави преподобныи нареченыи владыка Еуфимеи полату въ дворѣ у себе, а дверии у неи 30: а мастеры дѣлалѣ нѣмечкыи изъ Заморья с ногородскыми масторы.

В лѣто 6942. Князь Юрьи Дмитриевич взя град Москву и сяде на великом княженьи. Того же лѣта, въ веснѣ, прииха князь великои Василии Васильевич в Новъгород на святои недѣли, априля въ 1. Тогда же на святои недѣли, априля въ 5, выиха весь великыи Новъгород ратью на поле на Зарѣчьскую сторону к Жилотугу, а князь Василии былъ тогда на Городищи, и не бысть новгородцем ничего же. Того же [лѣта] преставися князь великыи Юрьи Дмитриевич. Тои веснѣ поиха на поставление Еуфимеи новгородчкыий кь митрополиту Герасиму въ Смоленьско априля 11; а князь Василии поиха на Москву априля 26. Тои же веснѣ подписана бысть прежняя полата въ владычнѣ дворѣ. Того лѣта прииха в Новъгород архиепископъ владыка Еуфимеи, поставленъ и благословенъ митрополитом Герасимомъ месяца маия 26. Того же лѣта прииха князь Василии Юрьевич в Новъгород при владыци Еуфимии. Тои осени выиха из Новагорода князь Василии Юрьевичь и много пограби, ѣдуци по Мьстѣ и по Бѣжичкому верху и по Заволочью, и много зла бысть от него. Тои же осени поставиша церковь камену в околоткѣ Иоанн Златоустъ, на старои основѣ, посадникъ Григории Кирилович и Есифъ ОндрѣяновичГорошкова [внукъ].

В лѣто 6943. Ѣздиша воеводы новгородчкыи в зимѣ: посадникъ новгородчкои Иванъ Васильевиць, и посадникъ Григории Кюрилович, и тысячкои Федоръ Олисиевич, Есифъ Васильевиць, Онанья Семенович, Остафѣи Есифович, и бояри новгородскыи и новгородчовъ иного, а с рушаны Федоръ Остафьевъ, Михаила Буйносовъ и порховицѣ; и идоша триима путми, и казниша ржевиць, и села вся пожгоша по Ръжевѣ, по плесковьскыи рубежь, божиею помощью приидоша в Новъгород вси здрави и с полономъ. Тои же зимѣ князь великыи Василии Васильевич человаше крестъ к новгородчомъ, а новгородци къ князю великому человаша крестъ, отступитися князю великому новгородчкои отцины Бѣжичкаго верха и на Ламьском волокѣ и на Вологдѣ, а новгородчкымъ бояром отступитися князьщинъ, гдѣ ни есть; и князь великыи нялъся слати своих бояр на розвод землѣ на Петровь день, а новогородцом слати своих бояр. Того лѣта заложи архиепископъ Еуфимии у себе во дворѣ церковь камену на воротех святыи Иоанн Златоустъ. Тои осени свершиша церковь ту; толко мастеры сверъшивъ сошлѣ съ церкви, и том часѣ церковь паде.

В лѣто 6944. Ослѣпленъ бысть на Москвѣ от князя Василья Васильевича князь Василии Юрьевиць. Того лѣта послаша новгородци на отвод земли на Бѣжичкыи верхъ посадникъ Григории Кюрилович и Ивана Максимова, а житьих Кузму Тарьсьина, Ивана Максимова, а иных на Ламьскыи волокъ и на Вологду; и князь великои своих бояръ не посла, ни отцины новгородчкои нигдѣ же новгородцом не отведе, ни неправы не учини. Того лѣта архиепископъ Еуфимии опять сверши святого Иоанна Златоустаго въ другии ряд и часы надъ полатою наряди звонящии. Того лѣта владыка Еуфимии заложи церковь камену святого Николу на Вежищах. Тои осени, божиимъ попущениемъ, мразъ поби обилье в жатву уже во всей Новгородчкои области; и тои же осени бысть вода велика и выломи ледом ноць мержею у великого мосту 7 городѣнь и Жилотугъ мостокъ снесе. Тои зимы послаша новгородци посадника новгородского Григориа Кюриловича к Жидимонту, и князь Литовьскыи Жидимонтъ человаше крестъ к новгородцемъ к послом, и взяша миръ.

В лѣто 6945. Прииха в Новъгород с Москвѣ, от князя великаго Василья Васильевича, князь Юрьи Патракиевич чорнаго бору прошати, и новгородци даша князю черный боръ, и выиха из Новагорода князь Юрьи Патрикиевич. Тои веснѣ подъписанъ бысть Иоанн Златоустъ въ владычнѣ дворѣ на воротех. Тои же веснѣ прииха изо Цесаряграда на Москву от патриарха Иосифа митрополит Сидоръ Гричинъ на митрополию. Тои веснѣ вода подмывала у Дитинца город, и оползевала земля от стѣны, и падеся стѣна камена и колоколница от Волхова. Того лѣта владыка Еуфимии на вѣцѣ в ризахъ благослови крестомъ посадниковъ и тысячкых и весь великыи Новъгород в недѣлю, и поиха на Москву к митрополиту Сидору июля въ 7, на память святого Фомы. Того лѣта паде церковь на Вежищах святыи Никола каменъ. Того лѣта владыка Еуфимии заложи церковь камену святыи Петръ на воротех у себе въ дворѣ, а старую церковь порушавъ. Того лѣта мостъ Великыи свершиша. Тои осени прииха с Москвы в Новъгород митрополит Сидоръ Гричинъ октября въ 9, и почестиша его владыка и посадникы и боярѣ и купчи и весь великыи Новъград, и на зимѣ поиха митрополит въ Пьсковъ [и] къ Цесарюграду; и во Пьсковѣ постави имъ анхимандрита Геласья и дасть ему суд владычнъ и вси пошлины.

В лѣто 6946 В веснѣ прииха в Новъгород князь Юрьи Семенович, марта въ 3. Того лѣта опять поставиша церковь святого Николу на Вежищах, на старои основѣ, каменъ.

В лѣто 6947. Постави архиепископъ Еуфимии ключницю хлебную камену. Того лѣта архиепископъ Еуфимии омаза извистью святую Софѣю всю. Того же лѣта постави архиепископъ Еуфимии колоколницю камену на старомъ мѣстѣ, на городѣ, идѣже палася до основаниа. Того же лѣта обрѣтено бысть тѣло архиепископа Иоана, при коемъ былъ суздалцѣ под Новымъгородом. Того же лъта архиепископъ Еуфимии позлати гробъ князя Володимера, внука великаго Володимера, и подписа; такоже и матери его гробъ подписа, и покровъ положи, и память имъ устави творити на всякое лѣто мѣсяца октября въ 4.

В лѣто 6948. Убьенъ бысть в Литвы князь великыи Литовьскыи Жигимонтъ Кестутьевич Олександромъ Черторискымъ и братомъ его Иваномъ, а княжилъ 9 лѣт. Сеи бѣ князь лют и немилостивъ и серебролюбивъ паче человѣкъ и много князеи литовьскых погуби и иныя истопи, а ины погуби мечем, а паневъ и земьскых людеи не мало безъ милосердия изгуби; того ради и богъ на него наведе сию злую смерть. И тако не яшася за сына его за Михаилу, за злобу отца его, и всѣ литовьскыи грады и рускыи избраша собѣ князя великаго Казимира королевича, Ягоилова сына, и посадиша его в Вилнѣ на великомъ княженьи тихо и безмятежно. Того же лѣта потерѣ Полтескъ всь; а князь Юрьи Семенович из Новаграда великаго выѣха в Литву, и князь великыи Казимиръ дал ему очину его всю, Мстиславъ и Кричевъ, иных градовъ и волостей не мало; он же възгордився, засяде Смоленско, и Полоческъ, и Витепьскъ и бяше ему не полезно и людемъ на мятежь великъ и на брань. Тои же осени, убоявся, видя свою дерзость, еже не разумьемъ створи, избѣже на Москву. Того же лѣта постави владыка церковь камену святую Анастасию. Того же лѣта постави владыка комнату камену меншую.

В лѣто 6949. На зимѣ князь великыи Московьскыи Василии Васильевич възверже нелюбье на Новъгород Великыи, присла грамоту розметную и повоева волостеи новгородчкых много. Новгородци же послаша архиепископа Еуфимья и с нимъ бояръ и житьих людеи, и наѣхаша его в Деревах у города у Дѣмяна, и докончаша с ним миръ по старинѣ, и даша ему 8000 рублевъ; а псковици, пособляя князю великому Василью, много землѣ Новгородчкои повоеваша и пакости створиша не мало. В то же время воеводы новгородчкыя с заволочаны по князя великого земли повоеваша много противу того, что князь воевалъ новгородчкыя волости. Тои же зимѣ приѣха митрополитъ Исидоръ съ осмого сбора на Русь из Рима, и нача зватися легатосомъ от ребра апостольскаго, сѣдалища римьскыя власти, и митрополитомъ римьскымъ, и нача поминати папу римъскаго въ службѣ, и иныя вещи новыя, их же николиже слышахомъ от крещениа Рускыя земля; а повелѣ в лячкых божницах рускымъ попом свою службу служити, а в рускых церквахъ капланомъ, Литва же и Русь за то не изымашася. Того же лѣта, повелѣньемъ пресвященнаго архиепископа великого Новагорода владыкы Еуфимья, подписана бысть церковь святыи Никола на Вежищахъ. Того же лѣта подписана бысть полата болшая владычня и сѣни пережнии. Того же лѣта постави архиепископъ Еуфимеи церковь святыи Борисъ и Глѣбъ, на старои основѣ, во Околоткѣ; и быша ему пособьници новъгородци.

В лѣто 6950. Приѣха митрополитъ из Литвы на Москву, и князь великыи Василеи Васильевич повелѣ ему служити; слышавъ от него въ службѣ, что поминаеть папу римьскаго, а не патриарха Цесаряграда, и иных вещии много не по обычаю Рускыя земля, и рече князь великыи: «при нашеи братии князеи великых Рускыя земля, сего не бывало, и азъ сего не хощу слышати»; и повелѣ жити ему в манастырѣ и приставомъ повелѣ стрещи его, он же избѣже въ Тферь и оттолѣ в Литву. Того же лѣта князь великыи московьскыи възверже нелюбье на князя Дмитрея Юрьевича и погонися по немъ; и онъ отбѣжа в новгородчкыи Бѣжичкыи верхъ, и много волостемъ пакости учини; и присла в Новъгород посолъ: «что бы есте мене приялѣ на своеи волѣ». Новгородци же отвѣщаша: «хошь, княже, и ты к намъ поѣди; а не въсхошь, ино какъ тобѣ любо». Того же лѣта постави боголюбивыи архиепископъ новгородчкыи владыка Еуфимеи святого Спаса Преображение в Русѣ, на старой основѣ, а быша пособници новгородци и рушани; и свершена бысть семтября мѣсяца въ 13 день. В тои же день приѣха из Новагорода архиепископъ, и повелѣ быти бдѣнью всенощьному, господьскаго ради праздника, и облечеся въ вся священыя одежа, и с нимъ сборъ святыя София, в повелѣ рускымъ игуменомъ и попомъ с собою службу служити, и свяща ю самъ на праздникъ Въздвижения честьнаго креста, и святую литургию свершивъ; веселяшеся блаженыи сердцемь и душею, възирая на храмъ святого Спаса и видя своего дѣла начатокъ добрѣ свершенъ еже устроивъ собѣ на память вѣчную и на оставление грѣховъ, и всимъ христьяномъ прибѣжище и радость и веселье вѣрнымъ, и похвала архиепископу от людии, приходящих в домъ святого Спаса и възирающимъ на церковь и глаголющимъ: «благословенъ богъ, иже положивъ на сердце господину нашему создати храмъ святого Спаса высочаише первои». И добрѣ ю украси, и иконы на златѣ добрым писаньемъ устрои, иныя потребныя мѣста добрѣ сверши, якоже подобаетъ церкви на красоту, и церковныя служебныя съсуды серебреныя створи, и иныя сосуды серебряныя устрои на потребу манастырю. В то же время былъ посадник новгородчкыи Иванъ Васильевич, держалъ руское посадниство. А священа бысть при игуменѣ Иванѣ святого Спаса. Того же лѣта постави архиепископъ владыка Еуфимеи церковь камену святого Николу въ своемъ дворѣ. Того же лѣта доставиша церковь камену святого Прокопья на Бѣлои. Того же лѣта постави архиепископъ владыка Еуфимеи поварьнѣ камены и комнату каменну въ своемъ дворѣ. Того же лѣта бысть пожаръ въ Плотьничьскомъ концѣ: загорѣся от Щитнои улицѣ мая въ 4, и погорѣ половина Конюховы улицѣ и Запольская вся, и за город прешед, погорѣ до Онтонова манастыря. И пакы, того же мѣсяца мая 11, на память священномученика Мокиа, загорѣся на Подолѣ, и бысть пожаръ лютъ и пакости людемъ много, и церквии каменых огорѣ 12, и христьяньскых душь богъ вѣсть колко погорѣ, и конець весь погорѣ до святого Георгиа, и ту преста на Лубяницѣ. И по малѣ временѣ, того же мѣсяца, погорѣ Заполье Микитины улицѣ, и бысть пакость людемъ велика, кои вносилися к нимъ съ животы своими. Си же пожары бывають грѣхъ ради наших, да ся быхомъ покаялѣ от злобъ своихъ. В то же время людие от скорби тоя великыя пожарныя, похвативше люди, глаголюще от ярости смушени: «въ таинѣ ходите и людемъ не являитеся, и зажигаете град, и людѣи губите»; и овѣх на огнѣ сожьгоша, а иных с мосту сметаша. А богъ вѣсть, испытая сердца человѣческая, право ли есть глаголющаа.

В лѣто 6951. Постави архиепископъ великого Новагорода владыка Еуфимеи духовницу камену и сторожну камену въ своемъ дворѣ. Того же лѣта поставиша церковь камену святого Николу на Кречевѣ.

В лѣто 6952. Семтября 14 приѣхалъ князь Иванъ Володимерович в Новъгород на пригороды, на которыхъ был Лугвень и сынъ его Юрьи по новгородчкому прошению; а князь Юрьи Лугвеньевич поѣха къ Нѣмцемъ, и Немьцѣ ему пути не даша, и онъ отъѣха на Москву. Тои же осени пришедши Нѣмцѣ у Ямѣ города посад пожьгоша и берегъ повоеваша, а в Новъгород прислаша: «мы вас не воюемъ, а воюеть васъ князь Григории изъ заморья Клевьскыи про своего проводника Итолка Ругодивца»; а то все лгаша Нѣмци. Той же осени изъ князя великого отцины изъ Тферьского много повоеваша землѣ и селъ Новгородчкых Бѣжичкыи верхъ и Заборовье и Новоторскыи волости вси. А из Литвы князь великыи Казимиръ присла в Новъгород, а ркя такъ: «возмите моих намѣстниковъ на Городище, а язъ васъ хочю боронити; а съ княземъ есмь с московьскымъ миру не взялъ васъ дѣля»; и новгородци по тому не яшася. Тои же зимы, шедше новгородци в Нѣмѣцкую землю за Нарову съ княземъ Иваномъ Володимеровичемъ, поплениша и пожгоша много около Ругодива и до Пурдознѣ, и подлѣ Норову и до Чюдьского озера. Того же лѣта, събравшеся Нѣмци, местеръ со всими своими вои, пришедше под город под Яму, бивше и пушками, и стоявше 5 днии, и по Вочкои земли и по Ижерѣ и по Невѣ поплениша и пожгоша; а города ублюде богъ и святыи архистратигъ Михаилъ, не взяша, а самых Нѣмець много паде под городомъ, а инѣи язвени отъидоша въ свою землю. А в то же время в городѣ вь Ямѣ былъ князь Василеи Юрьевич Суздальскых князей; а новгородци послаша селниковъ лускых и вочкых и ижерьскых бояръ наперед, а сами хотѣша ити с ними за Нарову воевати съ княземъ Иваномъ Володимеровичемъ. И в то же время, по грѣхомъ нашимъ, начаша кони мрети в городѣ и по волостемъ велми много; новгородци же въспятишася и не поидоша за Нарову. А в то время псковици прислаша в Новъгород свои послы о миру, и узрѣша, оже в Новѣгородѣ кони много падуть, а новгородци не идоша за Нарову, и отъѣхаша безъ миру. Того же лѣта ходиша Корѣла на Мурманѣ, избиша ихъ и повоеваша, и пленивше, и приидоша здоровѣ.

В лѣто 6953. Архиепископъ великого Новагорода владыка Еуфимеи постави церковь камену на Хутинѣ святого Варлама, а на верху колоколницу. Того же лѣта архиепископъ Еуфимеи великого Новагорода заложи манастырь святого Георгия в Городкѣ, и стѣну каменую понови, и церковь святого Георгиа понови и подписа, идѣже опало, и покры ю чешуею, и бысть христьяномъ прибежище. Того же лѣта приѣха в Новъгород с Москвы князь Юрьи Лугвеньевич, и новгородци даща ему коръмление, по волости хлѣбъ, а пригородовъ не даша; а князь Иванъ отъѣха в Литву. Той же зимѣ князь великыи Василеи насла Тотаръ, два царевица на литовьекыи городы, на Вязму и на Брянескъ, и на иныи городы безъвѣстно, и много потратиша, и въ полонъ сведоша и пожьгоша, мало и не до Смоленьска. И то слышавъ князь Литовьекыи Казимиръ, и посла своихъ пановъ и рать свою на Можаескъ и на иныи городы, 5 городовъ взя, и плени земли много и повоева, и христьяньству погибель велика бысть. Тои же зимы поиде князь великыи Василии противу тотарьского цесаря Махмета, и много христьянъ от мраза изъмре, а иных Тотарове избиша и землю пусту сътвориша; и пособи богъ князю великому Василью, и побѣгоша Тотарове, а иныи побьены быша. Тои же зимѣ князь Тферьскои Борисъ взялъ новгородчкых волостей 50, повоева и пограби бѣжичкых118 и около Торьжку, и Торжок взялъ. Тои же зимы послаша новгородци на съѣздъ с Нѣмци, с местеромъ, князя Юрья и бояръ и купцевъ; и местеръ же захотѣ Острова,119 того ради безъ миру розъѣхавшеся. А в Новѣгородѣ хлѣбъ дорогъ бысть не толко сего единого году, но всю десять лѣтъ: по двѣ коробьи на полтину, иногда боле мало, иногды менши, иногда нѣгдѣ купить; и бысть скорбь и туга христьяномъ велми, толко слышати плачь и рыданье по улицам и по торгу; и мнозѣ от глада падающе умираху, дѣти пред родители своими, отци и матери пред детьми своими; и много разидошася: инии в Литву, а инии в Латиньство, инѣи же бесерменомъ и Жидомъ ис хлѣба даяхуся гостемъ. А в то же время не бѣ в Новѣгородѣ правдѣ и праваго суда, и въсташа ябетници, изнарядиша четы и обѣты и целованья на неправду, и начаша грабити по селамъ и по волостемъ и по городу; и бѣахомъ в поруганье сусѣдомъ нашимъ, сущимъ окрестъ нас; и бѣ по волости изъѣжа велика и боры частыя, криць и рыдание и вопль и клятва всими людьми на стареишины наша и на град нашь, зане не бѣ в насъ милости и суда права. Того же лѣта постави архиепископъ Еуфимеи церковь камену святого Еуфимья теплую у себе в сѣнехъ, и подъписа и иконами украси; а все то здѣлано в четыре мѣсяци. Того же лѣта поставиша княжанци церковь камену святыхъ Мироносиць на старои основе. Того же лета поставиша в Русѣ церковь камену святыи Дмитрии. Того же лѣта Василии Шенкурьскои и Михаила Яколь, воеводы новгородчкыи, поидоша ратью заволочкою въ трех тысяцахъ на Югру; и поимавше югорьскых людеи много, и жонъ яхъ и дѣтеи, и располошишася; онѣ же, Югрици, доспѣвше над ними облесть, а ркя тако: «мы хотимъ вамъ дань даяти, а хотимъ счестися, и указати вамъ станы и островы, уречища»; а в то время скопившеся и ударившеся на острогъ на Васильевъ, и много добрых людеи, дѣтеи боярьскых и удалых людеи избиша 80; и бѣ жалостно слышати убьенье ихъ. А Василии убѣжа съ сыномъ своимъ Семеономъ в малѣ дружинѣ, а иныи разбѣгошася по лѣсу; а другыи воевода Михаила Яколь в то время былъ во инои рѣкѣ, и потомъ Михаила приѣхалъ къ Васильеву острогу и видѣ острогъ разоренъ, а своихъ побитыхъ, а иныя разбѣгъшися, и нача искати своихъ по рѣцѣ; и скопишася к нему Василеи съ сыномъ и иная и вси, и приѣхаша въ свою землю. Того же лѣта приидоша Свѣя Мурманѣ безвестно за Волокъ на Двину ратью, на Неноксу, повоевавъ и пожгоша и людеи пересѣкоша, а иных в полонъ поведоша. Услышавше то двинянѣ, придоша вборзѣ иных иссѣкоша, а иных прислаша въ Новъгород с четыредесятъ; а воеводы ихъ, Ивора и Петра и третьего, убиша; инѣи же, мало вметавшеся в корабли, отбѣгоша. Того же лѣта створися знаменье велико во градѣ Суздалѣ, въ церкви святыя Богородица сборнои, мѣсяца априля 20, в канунъ Препловенья, при великом князи Василии Васильевичѣ, при епископѣ суздальскомъ Аврамьи: начашася напрасно святительскыя гробы внутри горѣсти и падати, а на завтрее, въ самыи празникъ Препловленья, падеся церкви сборная святая Богородица. Того же лѣта князь великыи Василии, собравъ вои, и поиде на того же Махмета и приде въ Суздаль; и бывшу ему въ Еуфимьева манастыря, и без вѣсти наидоша Тотарове, и бысть сѣча велика князю великому с Тотары, и по грѣхомъ нашим побѣженъ бысть князь великыи; изымавше его Тотарове, и ведоша его во Орду, а с нимъ князя Михаила Ондрѣевича и иных множество бояръ и молодых людеи и чернцевъ и черниць, а иных множество иссѣкоша; а князь Иванъ Ондрѣевич и князь Василии Ярославлич а тыи ранены в малъ дружинѣ утекоша. А опослѣ того побитья от Тотаръ и сие бысть зло: на 6 день, егда збѣгошася въ Москву и со животы изо всих сторонъ останокъ людеи, и загорѣся Москва внутри города и выгорѣ вся, и много христьянъ погорѣ, числомъ семьсотъ; а животы всѣ погорѣша, и верхъ въпаде церкви сборныя святого Михаила, а другая церковь паде Въздвиженье честнаго креста. Того же лѣта, месяца августа 7 день, архиепископъ великого Новагорода владыка Еуфимии, благословивъ своихъ дѣтеи посадниковъ и тысячкых и весь великыи Новъгород, и поѣха за Волокъ благословити новгородчкую отцину и свою архиепископью и своихъ дѣтеи. Того же лѣта, месяца августа 22, князь тферьскыи Борисъ, приславъ своихъ воевод на Торжокъ, останокъ людеи разгна и пограби, а иныя погуби, а иныя на окупъ подая; а животовъ и товара московьского и новгородского и новоторьского сорокъ павосковъ свезе въ Тферь, а иныя павоскы потопиша в рѣцѣ с товаромъ; а в Бѣжичкомъ верьху и по Заборовью осмидесят волостеи повоева въ два году.

В лѣто 6954. Отпусти цесарь Махмет князя великого Василья на Рускую землю и взя на немъ окупа двѣстѣ тысяць Рублевъ, а иное богъ вѣсть да онѣ. Того же лѣта начата людие денгѣ хулити серебряныя, даже и всѣ новгородци другъ на друга смотря, и бысть межи ими голка и мятежь и нелюбовь; и посадник и тысячкыи и весь Новъгород уставиша 5 дѣнежьниковъ, начата переливати старыи денги, а новыи ковати в ту же мѣру, на 4 почки таковых же, а от дѣла от гривны по полуденги; и бысть христьяном скорбь велика и убытокъ в городѣ и по волостемъ; да и сие не забвено будеть в послѣднех родех. Того же лѣта генваря въ 3, бысть облакъ тученосенъ и з дожгемъ, и паде вкупѣ пшеница и рожь и жито на полѣ и на лѣсѣ от града за 5 верстъ, вдале от Волховца и до Мьстѣ рѣкѣ на 15 верстѣ; людье събравше елико кто изообрѣтъ, и принесоша въ град; гражанѣ же стекошася видити сие преславное чюдо, откуду и како бысть. Тои же зимы, месяца генваря 23, приѣха архиепископъ изъ Заволочья в Новьгород. Того же мѣсяца въ 30, на память святых треи святитель, Василья Великого, Григорья Богослова, Иоана Златоустаго, архиепископъ Еуфимеи свяща сборомъ церковь теплую святого Еуфимья.120

Примечания

1. В рукописи лѣтописание князей князь и земля руския, причем перед князь вставлено чистое место для написания нескольких букв.

2. В рукописи лѣтописание князей князь и земля руския, причем перед князь вставлено чистое место для написания нескольких букв.

3. буква д над строкой.

4. Новг. 4-й летописи воименовася.

5. Новг. 4-й летописи воименовася.

6. В рукописи по описке ибо не многая мѣста. В Новг. 4-й и по многа мѣста.

7. В рукописи по описке ибо не многая мѣста. В Новг. 4-й и по многа мѣста.

8. Соф. 1-й инии же, яко и ловы дѣяше.

9. Соф. 1-й инии же, яко и ловы дѣяше.

10. В рукописи после слова послѣдня оставлено чистое место для написания нескольких букв. В Новг. 4-й последняя лѣта.

11. В рукописи попании.

12. В Новг. 4-й прибѣгнеть.

13. В рукописи ския.

14. В Новг. 4-й приимая.

15. В рукописи тво, причем далее оставлено чистое место для написания нескольких букв. В Новг. 4-й творимыхъ.

16. В рукописи въскла, причем далее оставлено чистое место для написания нескольких букв. В Новг. 4-й въскладаху на.

17. В рукописи ониже. В Новг. 4-й нъ (но) оже.

18. В рукописи ониже. В Новг. 4-й нъ (но) оже.

19. В Соф. 1-й не ждяху (испр.: жадаху).

20. В рукописи мало ми.

21. В рукописи извѣ есть. В Новг. 4-й извѣется.

22. От слов многа да отселъ Толстовский список печатаем не в основном тексте, а в вариантах. От слов многа да отселѣ в основном тексте напечатан Комиссионный список, в котором начала Новгородской летописи недостает. Комиссионный список Новгородской летописи начинается с этих слов.

23. В квадратных скобках из Т.

24. взлюбленаа.

25. останемъся.

26. несытоства.

27. не.

28. уроки.

29. пишеть.

30. насилиа.

31. в.

32. вѣчнии.

33. причастници.

34. таковаа.

35. жъ.

36. руськои.

37. земли.

38. извѣстно.

39. В Троицком списке читалось до Олекси Исакья (см. А.А. Шахматова Киевской начальный свод 1095 года в сборнике «А.А. Шахматов», 1947 г., стр. 131).

40. В рукописи когождо.

41. кождо.

42. Нет

43. Нет

44. В рукописи когождо.

45. кождо.

46. другому.

47. другому.

48. третьему.

49. третьему.

50. кии.

51. Буква подправлена другими чернилами.

52. другой.

53. нарекоша имя граду тому киевъ.

54. нарекоша имя граду тому киевъ.

55. уловища.

56. звѣрье.

57. быша.

58. мужие.

59. мудры.

60. смыслени.

61. и нарицахуся.

62. от них же.

63. от них же.

64. нынъ поляне и до сего дне.

65. погани.

66. Нет.

67. проции.

68. погании.

69. сиа.

70. бысь.

71. греческой.

72. рекше царьскомъ градѣ.

73. Михаилъ царь.

74. проповѣдаетъ.

75. первую.

76. семъ же цари паки.

77. на русь.

78. Написано на полях вверху тем же почерком, но более светлыми чернилами, с выносным знаком.

79. Написано на полях вверху тем же почерком, но более светлыми чернилами, с выносным знаком.

80. двѣ стѣ.

81. двѣ стѣ.

82. суды.

83. сотвориша.

84. убиство.

85. великое.

86. хрестьяном.

87. мольбу.

88. влахерьнѣ.

89. тако же.

90. изнесше.

91. скуть.

92. Нет.

93. Нет.

94. Нет.

95. вста.

96. потопляше.

97. в морѣ и.

98. си.

99. взвратишася.

100. лѣтѣхъ.

101. братия.

102. изгыбоша.

103. обидимѣ.

104. древляны.

105. иными.

106. окольними.

107. надоша.

108. платити.

109. сдумавше.

110. поляне.

111. нѣсоша.

112. козарѣ.

113. ко.

114. они.

115. козарьстии.

116. дань сиа есь намъ.

117. оружие.

118. Так в рукописи.

119. В рукописи строва.

120. Внизу на полях почерком второй половины XV в. написано в лѣто 6984 тма была в заговенье в, далее следы нескольких букв. На словах святого Еуфимья кончается Комиссионный список Новгородской первой летописи. Лист 264 об. оставлен чистым.

Предыдущая страница К оглавлению Следующая страница

 
© 2004—2024 Сергей и Алексей Копаевы. Заимствование материалов допускается только со ссылкой на данный сайт. Яндекс.Метрика